حاجه من زمان

وانا عيله صغيره ماعرفش حاجه كان اخويا يجي يسمعني اغانى من شريط(كولكشن)عامله، كلها اغانى هندي أو إنجليزي وساعات فرنساوى ولما سألته عن أغنيه هاديه(حسيت إنها رومانسية وأنا طول عمري خلبوصه) قالي دول(باك استريت) هزيت راسي وقلتله(اااااااااااه)طبعا ولا أنا اعرف مين دول، بعدها بكام يوم جاب جرنال لقي فيه صور للفريق ده وفرجنى عليهم (دول ياستى باه اللي بسمعهم)ومعاهم طبعا(ويست لايف)و(سبايسى جيرلز) قعدت مليت عيني منهم..عادى ولا فاهمه حاجه وكان نفسي افهمه انى لسه في رابعة ابتدائي يعنى اللي يهمني في الحياة هو واجب الحساب يكون صح...
كبرت شويه ودخلت اعدادى..بقيت فاكره نفسي بفهم باه...شفت أغنيه (show me za meaning) على الجهاز عندي(أيام ماكان لسه جديد) مع شلة اغانى الفترة دي زى(بيلاموس)ل(انريكو)الامور و(ماسك أوف زورو)والحاجات دي كلها...عجبنى التصوير بتاعها أوى وابتديت باه أحفظ أغانيهم وأترجمها وبقوا فريقي المفضل برقصهم وصوتهم اللي ممكن يتقلب في لحظه ويغنى كلاسيك...أغانيهم كانت في كشاكيلي بتاعت المدرسة(لانى مكنتش بكتب فيها حاجه تانيه) ...لكن الفريق بطل غنا..سكتوا فجأة زى اى حاجه حلوه ..عادى بالنسبهالى لانى فضلت اسمع نفس الاغانى واكرر فيها..
وفضلوا من أحلى الذكريات.. بيفكرونى بأيام حلوه وبقعدتى مع اخويا والضحك بتاع تصوير أغنية(
backstreet's back)والرومانسية الجامدة أوى في أغنية(as long as)...بس خلاص سكتواا

*******************
(باك استريت نزلوا شريط)قالتهالى نرمين صاحبتي(وهى مجنونة باك استريت برده) ويومها نزلت جرى على النت
عشان اعرف أخبار الناس دي اللي مش باينه بقالها زمان لقيت في شريط اسمه(never gone)وشفت أعضاء الفريق لقيتهم كبروا فعلا ...بصيت عليهم في البوستر وفى الكليب وقلت(يااااااه)فين أيام الشعر الأصفر المسبسب يا(نيك)واللي كان يتهز أوى وهو بيرقص دلوقتى رفعه خلاص مبقاش نازل على عنيه ولا حاجه...وفين المونكير الأسود وشكل الهيبيز بتاع(ايه جى ماكلين)بقى دلوقتى لابس بدله وبتاع مع ان التاتو اللى مالى جسمه برده باين..كان شكلهم كبير فعلا..خلاص مابقوش(boyz)بقوا(men) أو على رأى سعيد صالح (menz)...خلوني بصيت على نفسي...أنا كمان كبرت مش البنت الصغيرة اللي بتستنى لما مامتها تخرج وتعلى الكاسيت وتتنطط زى المجانين على الاغنيه بدل ما تذاكر كلمتين..بقيت كلها كام سنه وابقى مهندسه..ااااه زمن..

الشريط التانى اللي نزلوه بعد العودة اسمه(unbreakable)على نفس مستوى الشريط الأول مع إن (كيفين)ساب الفرقة بس بصراحة محستش بفرق لان كيفين صوته مش مؤثر أوى.

بس تعرفوا الاغانى القديمة بتاعتهم برده أحسن ميت مره مع أنى حبيت اوىالشريطين الجداد..بس لما أحب اتمزك ارجع للفولدر بتاع(ميلنيم)و(باك استريتس باك)والاقينى تانى لسه في اعدادى وسماعات الصب كأنها صوت الكاسيت والجنون القديم...
المهم..أنا حطاه أغنيه بحبها أوى للفرقة دي وياما سمعتها وانا صغيره وبحبها جدا لان ذكرياتها حلوه اوى...اسمعوها وانتوا تحكموااااااااااااا
وده اللنك بتاعها

http://www.youtube.com/watch?v=AgH-jWCny9U&feature=user
البوست ده ليكي..ياصديقتي الاولى