فتحت على قناة المحور..كويس حلوه القناة دى..منى الشاذلي والعاشرة مساء..لا مش وقته خالص كنت لسه حغير لقتها بتقول (ونستضيف اليوم المهندس:أحمد عز)يانهار ابيض!!!الراجل القصير المرعب..كان فيه فى الاول كام تقرير مصور بيحكوا فيه عن حياته..والصور المعروفه ليه بالنظرات اللى من تحت لتحت دى..قمت بسرعه قطعت بطيخ وجيت..وتاتاااااااااا..جه الوحش الرهيب...المحتكر القذر..صاحب اكبر شركات الحديد فى مصر..سيراميكا الجوهره..امانة الحزب الوطنى..والبديل الشيك للغبى:كمال الشاذلى وفوق كل ده ممول حملة الريس الجميل الصغنن:محمد حسنى
طبعا (مني)مانستش اى حاجه من الحاجات دى وقعدت تقولنا مين الراجل المهول اللى قدامنا ده..اول مره بصراحة اشوف الراجل ده بره مجلس الشعب والكاميرا باه مركزه عليه سالت نفسي سؤال محيرنى بجد(ليه الناس دى مصرة تصبغ شعرها؟؟)ماهو بيل كلينتون وبوش وريتشارد جير وحتى المرحوم حبيب حياتى روك هادسون كانوا بيسيبوا شعرهم الابيض ليه عندنا الفئه السياسيه مصرة على الصبغه السودة؟؟ولا اسوة بالرئيس مبارك رضى الله عنه؟؟يمكن..المهم..منى رحبت طبعا وابتدت الاسئله..انا ممكن احكيلكوا النص بالظبط بس كله بصراحه كلام فاضى..اه والله كلام فاضى جدا كمان..كانت (منى)تسأل فى حاجة وهو(ابن اللئيمه) يرد على حاجه تانيه خالص..كلامه شيك جدا...كلام واحد سياسي بارع كأنه بقاله سنين شغال فى السياسه..هيا تسأل اللى عاوزاه وهوا يجاوب باللى عاوزه وحكى قصة حياته كاملة وانه من اسرة غنية اصلا وقعدت منى تحاول تسكته انما على مين؟؟ كان برده بيقول اللى هوا عاوزه من غير ماينسي النظرة اللى بتقول كتير اوى زى(استنى ياحشره لما اخلص كلامى)وساعات(كلاب.. كلكوا ..كلاب)..عيون واحد اتعود انه مايسمعش يأمر بس..حتى منى كلمته عن(نظراتك الآمره)رد عليها طبعا فى حاجات تانيه ومسئولياته وبتاع...
النهاية:خلصت البرنامج وطبق البطيخ واكيد الوجع اللى فى بطنى مكنش من البطيخ
***********************
قلبت شويه
جت قناة اسمها(موجة كوميدي)بصراحة انا معرفش القناة دى وشكلها جديد..وكاتبين ان كل اللى يجي عليها كوميدي....طبعا دى حاجه تفرح اى حد عنده اكتئاب مزمن زيي وبالذات بعد وش (عز)والنظرات اللى خلتنى عاوزه اتف على نفسي..لبدت قدام القناة قلت لما اشوف بأه اخرتها ايه..اعلانات زباله من بتاعت(0900)بس الحقيقه الاعلانين اللى شفتهم على القناة دى مشفتوش على قناة تانيه..قمة فى الاستفزاز لدرجة انى ابتديت اندم انى شتمت على اعلانات ميلودي :)..بعدها جابوا(نشاهد غدا)لقيت مسرحية..راجل وست ستات..عائلة ونيس..الله الواحد مشفش المسلسل ده من زماااان..وبعدها جابولى..(بعد قليل) طلع اييييه؟؟؟ (وجهة نظر)..المسرحية الجميلة الجميلة جدا جدا جدا
محمد صبحي..فنان بكل حته فيه حتى شكله ينفع يتحط فى القاموس تحت كلمه فنان..عنيه الحزينه وشعره الخفيف وجسمه الرفيع جدا ووشه اللى مليان تعبيرات..صحيح هوا ساعات بحسه(بيمثل)فعلا ودى حاجه تبوظ اى عمل كويس..بس فعلا..عظيم
عبلة كامل..ممثله فوق الوصف..تعبيراتها اللى كلنا عارفينها وبنحبها ومحدش يعرف يعملها غيرها..ممثله مافيش زيها لا ف مصر ولا غير مصر وعرفت يبقلها اسمها من غير ماتنزل بمستواها درجة..
شعبان حسين..التربى صاحب العبارة المشهوره(النساااء فتنننننه..الطعام فتنننننه)..
هانى رمزى..قبل مايتخن ودمه يتقل على قلبى حبتين مع انى بحبه برده
هناء الشوربجى..الجميله
رياض الخولي..أيام ماكان لسه بيمثل وبرده قبل الكرش
الفريق كله هااايل بجد..
اتفرجت على المسرحية اللى انا اصلا حافظه كل جملة فيها وكل حركه وبرده كنت بضحك..مكنش بيعكنن عليا غير ال(بريك)اللى ف النص..القناة ماشاء الله موضوع الضحك قلب معاها باستظراف بتجيب ف البريك واحد(ولا واحده والله مااعرف) لابس باروكه وماكياج والحاجات دى ويرقص على اغانى اجنبى او عربى وبعدها يجيبلك صوت حد مسخسخ من الضحك وشعار القناة(موجة كوميدي..الضحك من أول نظره) ....استحملته مره واتنين وبعدها قلت مابدهاش..مع انى بكره انى اغير القناه وانا بتفرج بس عملتها وبقيت بقلب على(فوكس موفى) بدل ما اقوم اكسر التلفزيون او مزاجى يتقلب
خلصت المسرحية وبغض النظر عن الناموس اللى هرانى..والاعلانات الرخمه..والراجل ابن الظريفه..بس فعلا تحفه فنيه الممثلين فيها بيطلعوا كل مجهودهم وحاسه ان المسرحيه دى لو حد من بلاد بره عملها مكنتش حتبقى بالروعه والكوميديا والاحساس ده كله
المسرحيه خلصت حسيت بعدها انى مبسوطه فعلا نسيت الاكتئاب واحمد عز والنتيجه والملل والحاجات الكتيرة الخنيقه شكرا يا استاذ(محمد صبحي)...فعلا استاذ
ليست هناك تعليقات:
إرسال تعليق