رفعت عينى من على الكتاب اللى قدامى وبصيت على الشباك وسرحت فى لون السما الازرق اللى بحبه اووى بحبه زى ماكنت بحبك..ابتسمت وسالت نفسي ياترى بتعمل ايه دلوقتى؟؟؟
جايز تكون قاعد بتشرب سيجاره وانت بتتفرج على الناس من بلكونة بيتكم العاليه والناس تحتك زى النمل وبتفكر (كنت دايما بتفكر حتى وانت معايا)....
وجايز تكون زى اى حد بتفكر فى المذاكره والامتحانات وخايف من الماده الجايه(كل مااتخيلك بتذاكر بضحك اوى حاساك اكبر من الحاجت دى)....
وجايز تكون بتاخد دش..الجو حر جدا وانا عارفاك مابتطيقش الحر...
جايز تكون بتتفرج على التليفزيون وبتقلب فى القنوات ..الريموت فى ايد وكباية الشاي فى ايد...
جايز تكون بتلعب قى الموبايل مع انك حافظ كل حاجه فيه بس بتضيع وقت وخلاص...
جايز تكون بتلعب كوره مع صحابك مع انك لاعب كوره فاشل زى ماقلتلى...
وجايز..يعنى بقول جايز...تكون...............بتفكر فيا زى مابفكر فيك..
حطيت وشى فى الكتاب وكملت مذاكره..وانا بدارى دمعة حتنزل على خدى...
هناك 3 تعليقات:
يخرب عقلللللك
انا اديا ورمت من كتر الضرب على مساند الكرسي وقولة (( جامدة جامدة جامدة))
عارفة ؟ أجمل ما في التدوينة دي الصدق الشديد والتلقائية والمصرية وحطي تحت كلمة مصرية دي مليون خط
حسيت أنك أختي أو جارتي
بجد برافو عليكي
تحياتي الباااالغة
ا اشرف انا عنيا دمعت وانا بقرا تعليقك بجد كان نفسي اسمع راى من حد بيفهموجالى استاذ فهم زى زيك...
اتمنى انك تبقى زبونى باه بعد كده واللللللللللف شكر
حمار حصاوى انا بقى
إرسال تعليق