كلام فى المدينه....

(المدينة الجامعية بالمنيا تحرم وجود البيض النى داخل حجرات الطلاب)يعنى من الاخر لازم يكون مسلوق..والله مابهزر ده كلام جد والفرعونه الكبيره(ماجده)اللى بيترعب منها كل كبير وصغير من مشرفين المدينه اديت القرار الجامد جدا ده فى لحظه مزاج عالى منها كده,مش عارفه ياجماعه الوليه دى حفيدة قراقوش تقريبا ولاى هيا عندها حساسيه من البيض المهم ان المشرفه اللى قالت لنا الكلام ده كانت مسخسخه من الضحك..ياماجده باشا انتى لسعتى خلاااااااااااااااااااااااص

**************

مبنى طالبات هندسه فى مدينة الاخصاص بالمنيا مافيهوش ولا مشرفه يعنى من الاخر زيطه وزمبليطه ورقص وصوت عالى وبقى المبنى المختص بكل مكالمات الحبيبه بتوع طب,يعنى البنت اللى بتحب تيجي الدور عندنا عشان تعرف تتكلم فى الموبايل لانها لو اتكلمت عندها فى الدور حيضربوها بالنار...شكرا ماما ماجده

*********************

لغوا اللحمه والفراخ والمكرونه وكل حاجه عشان الاكل غلى..دى حالة مطعم المدينه الجامعية فى المنيا كانهم بيصرفوا علينا من جيب ابوهم مش حاجات مدعمة..الواحد يسف التراب بعد كده..اللى يقهر بجد هوا كل العاملين فى المطعم اللى بيروحوا اخر اليوم واكياسهم ماليااااااااااااااااانه اكل وخيرات الله..منك لله ياماجده يابنت الكلب

**************

لو معدى جنب مدينة البنات وسمعت صوت حد بيصرخ ده عادى..دى انا ولقيت نفسى مضايقه شويه او واحده صاحبتى على طول بنعمل كده وساعات بنستهبل ونطلع فى الدور ونقول(مين الحيوانه اللى صرخت؟؟)...يعنى اموت من الكبت فى المدينه دى ولا اصرخ وخلاص؟؟انا اخترت الحل الاسهل..طظ فيكي ياماجده

***************

اى ولد فى الدنيا نفسه يدخل مدينة بنات واى بنت بترد على الجمله دى بابتسامه جانبيه(بس ياولد..),انا باه بقلك لو انت جدع تعال وانت حتندم على اليوم ده طول عمرك..اطلعى بره الموضوع ياماجده ودخلى المسكين ده

************

النور قطع فجأه فى المدينه..مش حتلاقى حد بيصرخ زى ما اى بنت حتعمل فى اى حته تانيه فى الكون بالعكس..حتلاقى كله رمى الكتب من ايده وقام يطبل ويغنى وهاتك يارقص..واهو محدش شايف التانى وعلى كده لحد ما النور يجي...مجانين اوى بس نعمل ايه لا تلفزيون ولا دياولوا

طبعا ياماجده فرحانه بقطع النور..جزمه

************

الحمامات فى المدينه غير صالحه للاستخدام الادمى..كلها مكسره وتلاقى يافطه كاتباها المشرفه على الباب(القاعده مكسوره ممنوع الدخول لانه فى خطوره)ياسلام على الشعر والاحساس العالى..طب طالما هيا مكسوره ماتصلحوها ياولاد الجزمه بس على مين باه ولما الحمام انهار نهائى من يومين جه السباك وتشرف وتكرم وصلحه..ربنا يخليك لينا ياعم محمد والله من غيرك ش عارفين حنعمل ايه بس كان حيحصل ايه لو كنت جيت صلحته من شهرين؟ولا حتتشل فى ركبك..كله من ماجده طبعا

********************

صاحبتى نرمين اديت المشرفه(زغذ)محترم وطردتها بره الاوضه(ايام ماكان فيه مشرفه)طبعا كل ده عشان المشرفه كانت بتحاول انها تسحب الوصله اللى هيا اصلا ممنوعه..اصيله يانرمين والله مش عارفه السنه الجايه لما تخلصى حلاقى مين غيرك يفترى على الناس غيرك

واهو كله بالعند فيكي يامااااجده

**********************

ماجده عملت كبسه مفاجئه على الاوضه بتفحص قال ايه (النظافه والنظام) طبعا كنا قاعدين بناكل فراخ ومكرونه يعنى اكلة ملوكى ولسه يادوبك مخلصين هجمت علينا الهبله ماجده وراسها والف سيف لتسحب مننا الكرنيهات لاننا سايبين الاكل على الطربيزه(غباء منياوي اصيل طبعا)المهم البنات قاموا يجيبوا الكرنيهات الا انا قلت لوحده صاحبتى تجيبهولى معاها لانى اصلا شايلاه مع صاحبتى دى..المهم طبعا ست الكل حست انى بنفضلها قامت خبطت على كتفى وقالتلى(قومى انتى ياماما) طبعا كل البنات فى الاوضه سابوا الكرنيهات ووقفوا يتفرجوا قلتلها بكل هدوء وانا بكز على سنانى(متمديش ايدك لو سمحتى)(شايفين الادب والاخلاق)قامت الجزمه خبطالى على راسى وقالت(خلاص يالا قومى..كده احسن؟؟) طبعا كل الناس اللى يعرفونى يعرفوا انه موتى وسمى انه حد يخبطنى على راسى وان الحركه دى بتنرفزنى جدا..لفيت ليها وانا ناويه اعملها عاهه مستديمه اصحابى مسكوا فيا وقعدوا يهدونى..اخدت الكرنيهات وهيا بتستحلفلى وانا بزغرلها....

**عملتلى الهبله محضر سب وقذف فى الجامعه وراسها والف سيف انى اتفصل...(ياريتنى كنت سبتها او قذفتها باى حاجه

**واسطة من نرمين صاحبتى وخرجت زى الشعره من العجينه...هههههههههههه

**وعد: المره الجايه حنط فى كرشها ان شاء الله

************************************************

بنات المدينه يعنى الوحده والخوف والقلق..يعنى انا وصاحباتى لوحدنا...يعنى بلد كارهه كل واحده مغتربه وبتقول عنها انها سافله..يعنى كليه صعبه ..يعنى سبينا فى حالنا ياماجده باه الله يحرقك